B u t t o n s
C o u n t e r
visited *loading* times
Hindi Biro ang Buhay, Hindi Isang Sugal
[para kay L at sa kanyang ina]
ni Mark Angeles
Paano ba maglalambat ng talinhaga
tungkol sa kanser ng isang ina?
Unti-unting kinakain ng bulok
na selula ang kanyang katawan.
Hindi na maitago sa kanyang ngiti
ang pangingitim ng kanyang balat
dahil sa chemotherapy.
Sasabihin ng ina: Maaari kang umiyak.
Alam nating pareho, trahedya
ang ipanganak sa pamilyang
isang kahig, isang tuka.
Umakyat pa sa bahay ang salot
at nagdala ng kanser.
Alam nating lahat ng bagay
ay iisa ang hantungan.
Mapaparam ang lahat ng haraya
ng kalungkutan at pagmamahal
ngayo’t kaharap mo akong namimilipit
sa sakit, unti-unting nalalagas
ang mga buhok. Mayayakap pa naman
ako’t kung kailangan mo ng tatakbuhan,
manipis kong katawan ang iyong ibalabal.
Anak, maaari kang umiyak.
Para sa akin. Pero para rin sa akin
subukan mong magpakatatag.
Tulad ng mahigpit mong pagkapit
sa paninindigang lihim at hayag
upang lumaya ang mga tulad nating
inaalipusta at naghihikahos sa buhay
na tampulan ng iyong malasakit
sapul ng iyong pagkabata.
