tiny and thin

literature and politics

Powered by TagBoard Message Board

Name URL or Email Messages(smilies)

 

Chika Kontra-Cha-Cha

Redemptorist Church, alas-9 ng umaga, isang Miyerkules

Maraming tao sa Baclaran. Pumwesto kami sa gilid ng simbahan para mangalap ng pirma kontra-Cha-Cha. Suot ang body placards, “Pirma Kontra Cha-Cha! Pirma Kontra kay Gloria!” para kaming promo girls and boys.  Lamang, hindi produkto ang inilalako namin kundi pagsusuri at panawagan.

Lumapit ang isang ale, binasa ang sign-up sheet na naglalaman ng Limang Dahilan Bakit Dapat Tutulan ang Charter Change ni Gloria. Tumango-tango siya at pumirma. Sabi niya sa ‘kin, “Noong isang linggo pa ako naghahanap ng ganito eh.”

Lumapit naman ang isang mama. Binasa ang plakard. Tinanong ako, “Sigurado ka bang anti-Cha Cha kayo? Baka mamya palitan ninyo ‘yan ha?” Sabay turo sa nakasulat sa sign-up sheet.  Hindi ko naman masisi si Manong. Dahil sa panloloko ng gobyerno, naging paranoid na siya.

Mataas ang sikat ng araw.  Pawis na pawis kami at hindi magkamayaw sa dami ng pumipirma. Wala kaming mesa at upuan. Paikot-ikot lang kami sa gilid ng simbahan, sa harap ng stalls ng mga manininda. 

Maya-maya, lumapit sa akin si Ate Norma, sabi niya nagkwento raw ang ale sa kabila. Pinapirma raw sa barangay nang hindi sinasabi para saan. Sinita kami ni Manong na nagtitinda ng diyaryo. “Uy, maghiwalay kayong dalawa. Mamya na ang kwentuhan para marami pa kayong mapapirma.” Nahiya tuloy kami.

Iyong isang manong, naghimutok pagkabasa ng polyeto, “Hmp! Gloria talaga! Kung hindi ko lang katatapos magsimba!” Halatang nagpipigil magmura.

Mayroon ding mag-asawa na pagkatapos pumirma, sumama sa aming manghikayat ng iba pa. Kahit walang hawak na megaphone si mister, yaya nang yaya sa mga tao. Ang linya niya, “Para sa atin din ito. Para ito sa bayan. Pirma na kayo.”

May isa pang empleyada ng gobyerno, humingi na maraming sign-up sheets. Papipirmahin niya raw ang kanyang mga ka-opisina. Binigay naman namin an gaming address. Ipapadala na lang daw niya kapag napuno na.

Nakakapagod pero masaya. Naipapahayag ng karaniwang tao ang kanilang disgusto sa pakanang Cha-Cha at kay Gloria.  Hindi kailangang bayaran o suhulan ng bigas kagaya ng ginagawa ng mga kapanalig ni Gloria.

 Sabi ng isa pang pumirma, “Kailan ang rali?”

Walang dudang ibabasura ng taumbayan ang Charter Change. Kahit nasa kanila pa ang malaking pondo at mga rekurso, hindi nila maloloko ang sambayanan. 

Posted by: ronalyn at 11:37 | link | comments (2) |